Այսօր՝ սույն թվականի հուլիսի 16-ին համայնքի ղեկավար Հովսեփ Առաքելյանը հրավիրել էր աշխատանքային խորհրդակցություն, որին ներկա էին համայնքի ղեկավարի տեղակալներ Վարդան Խաչատրյանը, Աննա Կարապետյանը, «Սիսիանի բնակարանային կոմունալ տնտեսություն» ՀՈԱԿ-ի տնօրեն Դավիթ Մարգարյանը, համայնքապետարանի աշխատակազմի Եկամուտների հաշվառման և հավաքագրման բաժնի գլխավոր մասնագետ, բաժնի պետի պարտականությունները կատարող Նունե Օրդուխանյանը, բնակավայրերի վարչական ղեկավարները։
Քննարկման թեման 2025 թվականի երկրորդ եռամսյակի ընթացքում բնակավայրերի ապառքների ցուցանիշն էր, ինչի կապակցությամբ Հովսեփ Առաքելյանը մեկ առ մեկ անդրադարձել է բնակավայրերի եկամուտների հավաքագրման ցուցանիշներին։
Ցուցանիշները բարելավելու համար համայնքի ղեկավարը հորդորել է վարչական ղեկավարներին և բնակավայրերի եկամուտների հաշվառման և հավաքագրման բաժնի աշխատակիցներին լինել ավելի խստապահանջ ու հետևողական, քանզի համայնքի զարգացումը պայմանավորված է միայն ու միայն եկամուտների հավաքագրման բարձր ցուցանիշներով։
Քննարկվել են նաև բնակավայրերի առաջնային լուծում պահանջող խնդիրները, որոնք հիմնականում վերաբերում էին խմելու ու ոռոգման ջրի ցանցերին, իսկ որոշ տեղերում էլ` բացակայությանը, միջգյուղական ճանապարհների հարթեցմանն ու լուսավորության ցանցերին, վարչական շենքերի բարեկարգմանն ու աղբահանությանը։
|